На выбарах у буйных гарадах Беларусі будуць усталяваны празрыстыя скрыні

На прэзідэнцкіх выбарах у буйных гарадах Беларусі Цэнтрвыбаркам плануе ўсталяваць празрыстыя скрыні для галасавання. 

Каментуючы прапановы апазіцыі па ўдасканаленні выбарчага заканадаўства, адно з якіх тычылася ўстаноўкі на ўчастках празрыстых скрыняў, Лідзія Ярмошына заявіла TUT.BY, што гэтае пытанне не патрабуе заканадаўчых змяненняў і ўжо пэўны час прапрацоўваецца ў ЦВК.

"Па рэкамендацыі Цэнтрвыбаркама, буйныя гарады ўжо ўсё заклапаціліся гэтай праблемай. І па меншай меры на гарадскіх участках будуць па магчымасці паўсюдна ўсталёўвацца празрыстыя скрыні для галасавання", — заявіла кіраўнік ЦВК.

"Вывучаючы адказы мясцовых органаў улады на нашы метадычныя рэкамендацыі, мы атрымалі інфармацыю, што пытанні ўстаноўкі празрыстых скрынь для галасавання паўсюдна прапрацоўваюцца. Прынамсі ва ўсіх абласных цэнтрах і ў Мінску. Я не магу гарантаваць, што яны будуць усталяваны паўсюль, але, прынамсі, іх будзе шмат", — дадала Лідзія Ярмошына.

Раней у ЦВК заяўлялі, што асноўнай прычынай, па якой у Беларусі на выбарах не ўсталёўваліся празрыстыя скрыні, была адсутнасць рэсурсаў у мясцовых уладаў.

Нагадаем, правядзенне прэзідэнцкіх выбараў у Беларусі чакаецца 15 лістапада 2015 года. Пра гатоўнасць прыняць у іх удзел заявілі старшыня Аб'яднанай грамадзянскай партыі Анатоль Лябедзька, кіраўнік Ліберальна-дэмакратычнай партыі Сяргей Гайдукевіч. Яшчэ адным верагодным кандыдатам ад апазіцыі стала актывіст кампаніі "Гавары праўду" Таццяна Караткевіч. Акрамя таго, пра свае планы па вылучэнні заявіў дзейны кіраўнік дзяржавы Аляксандр Лукашэнка.

Паводле TUT.BY



.